Landsvirkjun starfrækti árið 2013 þrettán vatnsaflsstöðvar, tvær jarðvarmastöðvar og tvær vindmyllur víðs vegar um landið á fimm starfssvæðum. Sextánda aflstöðin, Búðarhálsstöð, var tekin í fullan rekstur í mars 2014. Við rekstur aflstöðva er lögð áhersla á heildræna sýn þar sem ráðdeild, áreiðanleiki og sambýli starfseminnar við umhverfi og samfélag er haft að leiðarljósi.

Starfsemi Landsvirkjunar

Starfsemi fyrirtækisins 2013 skiptist í fimm meginstarfssvið. Þau eru orkusvið, þróunarsvið, framkvæmdasvið, fjármálasvið og markaðs- og viðskiptaþróunarsvið auk þjónustusviðanna; starfsmannasviðs, upplýsingasviðs og skrifstofu forstjóra.

Starfsemin er skilgreind fyrir umverfisstjórnun á tvo vegu. Annars vegar er starfseminni skipt upp í raforkuvinnslu í aflstöðvum fyrirtækisins á fimm mismunandi svæðum; Blöndustöð og Laxárstöðvum, Fljótsdalsstöð, Mývatnssvæði, Sogssvæði og Þjórsársvæði. Hins vegar er það önnur starfsemi fyrirtækisins en undir þann flokk falla þróunarsvið og framkvæmdasvið ásamt annarri starfsemi á skrifstofum fyrirtækisins í Reykjavík og á Akureyri.

Aflstöðvar og raforkuvinnsla

Landsvirkjun starfrækti árið 2013 þrettán vatnsaflsstöðvar, tvær jarðvarmastöðvar og tvær vindmyllur á fimm starfssvæðum víðs vegar um landið. Sextánda aflstöðin, Búðarhálsstöð, var tekin í fullan rekstur í mars 2014. 

Vatnsafl: 12.337 GWst. Jarðvarmi: 500,5 GWst. Vindafl: 5,5 GWst.

Raforkuvinnsla Landsvirkjunar árið 2013 var 12.843 GWst sem er um 4% aukning miðað við árið á undan. Á árinu hófst raforkuvinnsla í tveimur vindmyllum Landsvirkjunar á Þjórsársvæðinu. Þar sem sú vinnsla er hlutfallslega lítil helst heildarskipting orkuvinnslunnar nánast óbreytt og er 96% vatnsorka, 4% jarðvarmaorka og 0,04% vindorka. Raforkuvinnsla Landsvirkjunar árið 2013 var um 71% allrar raforkuvinnslu á Íslandi.

Orkutap og eigin orkunotkun aflstöðva Landsvirkjunar nam samanlagt 131 GWst árið 2013. Að langstærstum hluta er um eigin notkun í aflstöðvum að ræða. Ítarlegri tölulegar upplýsingar um raforkuvinnslu Landsvirkjunar og orkutap á starfsárinu má sjá í tölulegu bókhaldi.