Kolefnisspor er mælikvarði sem notaður er til þess sýna áhrif athafna mannsins á loftslagsbreytingar. Mælikvarðinn vísar til þess magns gróðurhúsalofttegunda sem við losum beint eða óbeint í okkar daglega lífi. Hægt er að draga úr kolefnisspori með kolefnisbindingu. 

Hlutfall losunar GHL í starfsemi Landsvirkjunar 2013. Hjá Landsvirkjun er kolefnissporið skilgreint sem árleg losun GHL vegna starfsemi fyrirtæksins að frádreginni áætlaðri kolefnisbindingu og kolefnisjöfnun vegna hennar. Landsvirkjun hefur í rúma fjóra áratugi staðið fyrir umfangsmikilli landgræðslu og skógrækt í nágrenni aflstöðva sinna og hefur árleg heildarbinding kolefnis verið metin um 22.000 tonn CO₂-ígildi. Á árinu 2013 var samið við Kolvið um að jafna alla kolefnislosun vegna notkunar fyrirtækisins á bensíni og dísilolíu á bifreiðar og tæki, vegna flugferða starfsmanna bæði innanlands og milli landa og loks vegna förgunar úrgangs. Alls nam þessi losun um 1.027 tonnum CO₂-ígilda árið 2013. Sú losun hefur nú verið jöfnuð með bindingu kolefnis í skógarvistkerfum landsins.

Kolefnisbinding felur í sér að auka gróðurþekju svo að gróðurinn geti tekið meiri koltvísýring úr andrúmslofti og dragi þannig úr styrk gróðurhúsalofttegunda.

Kolefnisspor Landsvirkjunar 26 þúsund tonn CO₂-ígilda. Samdráttur milli ára er 22%.

Þegar tekið hefur verið tillit til heildarkolefnisbindingar var kolefnisspor Landsvirkjunar árið 2013 um 26 þúsund tonn CO₂-ígilda. Kolefnissporið hefur dregist saman um 22% frá árinu áður og um 33% sé miðað við árið 2009. Munar þar mestu um samdrátt í útstreymi frá jarðvarmavirkjunum og aukna kolefnisjöfnun.

Kolefnisspor Landsvirkjunar á hverja framleidda GWst árið 2013 dróst saman um 16% miðað við árið 2012 og 28% miðað við árið 2009.

Losun GHL með tilliti til orkuvinnslu Landsvirkjunar árið 2013 var 3,7 tonn CO₂-ígilda/GWst ef ekki er tekið tillit til kolefnisbindingar. Losunin er 1,9 tonn CO₂-ígilda/GWst sé tekið tillit til kolefnisbindingar. Kolefnisspor Landsvirkjunar á hverja framleidda GWst 2013 dróst því saman um 16% miðað við árið 2012 og 28% sé miðað við árið 2009. Þess ber að geta að þegar losun GHL er miðuð við hverja unna GWst er ekki tekið með útstreymi vegna rannsóknarborana þar sem þær tengjast ekki orkuvinnslu viðkomandi árs. Auk þess er losun vegna þátta sem ekki er með beinum hætti hægt að rekja til viðkomandi orkugjafa skipt upp eftir vægi orkuvinnslunnar. Þetta á meðal annars við kolefnisbindingu og einnig losun vegna flugferða og úrgangs.

Styrkur jarðhitagass í jarðhitavökva er háður hegðun viðkomandi jarðhitakerfis og eru reglulegar mælingar á styrk gass í gufu mikilvægur þáttur í vinnslueftirliti. Breytingar á gasstyrk eru góður mælikvarði á breytingar í jarðhitageyminum og á flæði til yfirborðs. Styrkur jarðhitagass á Kröflusvæðinu jókst verulega á árum Kröfluelda, 1975–1984, en dróst síðan saman eftir að jarðhræringum lauk og gætir þeirrar lækkunar raunar enn.

Losun vegna rannsóknarborana á Þeistareykjum eru nú í fyrsta skipti teknar með í kolefnisbókhald Landsvirkjunar þar sem fyrirtækið Þeistareykir ehf., sem stóð fyrir þeim rannsóknum, er nú að fullu í eigu Landsvirkjunar. Útstreymi GHL frá jarðvarmavirkjunum Landsvirkjunar dregst saman miðað við fyrri ár, aðallega vegna breytinga á gasflæði í jarðhitageyminum við Kröflu og vegna lítils háttar samdráttar í orkuvinnslu og rannsóknarborunum.

Niðurstöður mælinga á brennisteinsvetni á árunum 2012 og 2013 í Reykjahlíð og Kelduhverfi

Reykjahlíð

• Ársmeðaltal fyrir styrk brennisteinsvetnis að Helluhrauni í Reykjahlíð reiknast 5,8 μg/m³ fyrir árið 2012 og 5,1 μg/m³ fyrir árið 2013. Að teknu tilliti til mælinákvæmni upp á ±3 μg/m³ fór styrkur brennisteinsvetnis því ekki yfir heilsuverndarmörk (5±3 μg/m³) árin 2012 og 2013.
• Daglegt hámark 24 klst. hlaupandi meðaltals af styrk brennisteinsvetnis fór aldrei yfir skilgreind heilsuverndarmörk í Reykjahlíð árin 2012 og 2013 skv. reglugerð.

Kelduhverfi

• Ársmeðaltal fyrir styrk brennisteinsvetnis að Eyvindarstöðum í Kelduhverfi var 1,7 μg/m³ árið 2012 og 1,2 μg/m³ árið 2013. Útreiknuð gildi eru þó ekki marktæk sökum þess að of marga daga vantar í meðaltalið og mælinákvæmnin er ±3 μg/m³.
• Daglegt hámark 24 klst. hlaupandi meðaltals af styrk brennisteinsvetnis fór aldrei yfir skilgreind heilsuverndarmörk í Kelduhverfi skv. reglugerð en talsvert vantaði í mælingar árið 2012 vegna bilunar í mælistöð.

Nánari upplýsingar um niðurstöður mælinga á brennisteinsvetni má finna á vef Landsvirkjunar. Síritun á styrk brennisteinsvetnis við Reykjahlíð er einnig birt á vef fyrirtækisins sem liður í aukinni upplýsingagjöf um starfsemi fyrirtækisins á svæðinu.

Heildarútstreymi H₂S frá bæði raforkuvinnslu og rannsóknarborunum dróst umtalsvert saman árið 2013 frá árinu áður og mældist lægra en það var á árunum þar á undan.

Gróðurhúsaáhrif vegna brennslu jarðefnaeldsneytis og losunar frá rafbúnaði

Losun GHL vegna brennslu jarðefnaeldsneytis er reiknuð út frá magni eldsneytis sem notað er í starfsemi Landsvirkjunar. Áætlun um losun GHL byggir meðal annars á fjölda flugferða starfsmanna Landsvirkjunar auk upplýsinga frá Orkuspárnefnd og flugfélögum. Losun GHL vegna millilandaflugs starfsmanna Landsvirkjunar var metin fram til ársins 2011 og var áætluð losun 250 tonn CO₂-ígilda á ári. Árið 2012 fengust hins vegar upplýsingar um raunfjölda millilandaflugferða starfsmanna fyrirtækisins og lækkaði þá losun GHL vegna þeirra töluvert miðað við mat fyrri ára. Losun GHL vegna millilandaflugs árið 2013 var 121 tonn CO₂-ígilda. 

Árið 2013 voru notuð 270 kg af metani til að knýja ökutæki. Við notkun metans sem eldsneytis á ökutæki spöruðust um 800 kg CO₂-ígilda, sé miðað við meðallosun fólksbíls sem knúinn er dísilolíu.

SF₆ gas er notað sem einangrunarmiðill háspennubúnaðar í Fljótsdalsstöð og á Þjórsársvæðinu en leki eða óhapp getur valdið losun á gasinu. Gastegundin er mikilvirkust allra gróðurhúsalofttegunda eða 23.900 sinnum virkari en koltvísýringur. Losun GHL frá rafbúnaði hefur mælst einu sinni á síðastliðnum fimm árum, árið 2009.

Gróðurhúsaáhrif vegna urðunar og brennslu úrgangs

Urðun úrgangs veldur myndun hauggass vegna niðurbrots lífræns hluta úrgangsins. Hauggas samanstendur aðallega af metani og koltvísýringi en umhverfisáhrif metans eru mikilvirkari þar sem metan er talið vera um 21 sinnum virkari gróðurhúsalofttegund en koltvísýringur. Árið 2013 dró verulega úr magni óflokkaðs úrgangs sem fór til urðunar miðað við fyrri ár og þar með úr losun GHL.