Markmið Landsvirkjunar er að vera kolefnishlutlaust fyrirtæki. Landsvirkjun vinnur markvisst að því að draga úr losun gróðurhúsalofttegunda, meðal annars með því að minnka notkun jarðefnaeldsneytis í starfsemi fyrirtækisins.

Notkun jarðefnaeldsneytis

Jarðefnaeldsneyti er óendurnýjanleg auðlind og við brennslu þess losna ýmsar gróðurhúsalofttegundir. Má þar nefna koltvísýring (CO₂), metan (CH₄) og glaðloft (N₂O). Auk þess losna kolmónoxíð (CO) og svifryk sem valda neikvæðum áhrifum á umhverfið. Í starfsemi Landsvirkjunar er jarðefnaeldsneyti notað á bifreiðar, vélar og ýmis tæki. Magn aðkeypts eldsneytis og eldsneytis á bílaleigubíla, sem teknir eru á leigu á vegum fyrirtækisins, er skráð í grænt bókhald. Þess ber að geta að dísilolíunotkun verktaka vegna framkvæmda er ekki skráð í grænu bókhaldi Landsvirkjunar, enda ekki hluti af starfsemi fyrirtækisins. Nánari upplýsingar um eldsneytisnotkun verktaka við Búðarháls má sjá í tölulegu bókhaldi.

Dísilolía er meirihluti þess jarðefnaeldsneytis sem notað er hjá Landsvirkjun en mun minna er notað af bensíni. Árið 2013 jókst hlutur dísilolíu í heildarnotkun jarðefnaeldsneytis og var hann 96%, samanborið við um 90% á undanförnum árum. Bifreiðum sem knúnar eru bensíni hefur fækkað og því hefur hlutur bensíns dregist saman og var 4% á árinu. Að auki voru 270 kg af metani notuð til að knýja bifreiðar á starfsstöð Landsvirkjunar í Reykjavík.